"أنا أجيد عملي!" - محمد في بيتزا كورنر

"اسمي محمد، وعمري 24 سنة. بشتغل في بيتزا كورنر كل يوم من الساعة ٩ للساعة ١. أنا مسؤول عن ترتيب الصالة، بحضر الطاولات وبحط مفارش كل طاولة وبس أخلص بدخل على المطبخ بشوف الشباب اذا بدهم مساعدة. الشهر الجاي راح أنتقل على فرع أبو نصير لأنه أقرب على بيتي"

 "الروحة عالدوام أحسن من القعدة بالبيت. هيك بشتغل وبتسلى وباخذ راتب بآخر الشهر. يمكن أشتري بوط جديد بالراتب والباقي بدي أحوشه"

" قبل ما أبلش شغل خلصت دورة ICDL وأخذت الشهادة. بحب الكمبيوتر كثير وعنا لابتوب بالبيت. بعرف أشتغل عالوورد (word)  والاكسل (excel)  والبوربوينت (powrpoint) . أنا معلم، معلم في الشغل ومعلم عالكمبيوتر"

"أنا وأبوي صحبة كثير. بنطلع وبنطش مع بعض، ويوم الجمعة بنروح أنا واياه وأخوي عالجامع. لمّا بسمع قرآن بهدى. حطيت عندي قرآن عالموبايل. عندي كثير برامج حلوة منزلها عالموبايل. باس أكثر اشي بستعمل الواتساب whatsapp عشان أحكي مع أصحابي وتانجو tango والسناب تشات snapchat. مش كثير بحب الانستغرام"

ويقول احد زملاء محمد:

"أول ما قالولنا رح ينضم شخص ذوي احتياجات خاصة لفريقنا خفت، ما عرفت شو أتوقع لأني عمري ما تعاملت مع شخص مثل هيك من قبل. لكن اليوم حاجز الخوف الي بيني وبين محمد انكسر. محمد بيعمل شغله كثير منيح واحنا صحبة. ومش  باس هيك، محمد أشطر مني بالكمبيوتر والانجليزي، أنا ما بعرف ولا كلمة انجليزي، لكن محمد ما شاءالله عليه، اذا اجانا زبون ما بحكي عربي بنادي محمد يترجملي"